Isa 66 | NdeIBE | STEP | Nanku okutshiwo nguJehova: “Izulu liyisihlalo sami sobukhosi, lomhlaba uyisenabelo sezinyawo zami. Ingaphi indlu elizangakhela yona na? Indawo yami yokuphumula izakuba ngaphi na?

Isaiah 66

Ukwahlulela Lethemba

1 Nanku okutshiwo nguJehova: “Izulu liyisihlalo sami sobukhosi, lomhlaba uyisenabelo sezinyawo zami. Ingaphi indlu elizangakhela yona na? Indawo yami yokuphumula izakuba ngaphi na?

2 Isandla sami kasizenzanga lezizinto ukuze zibe khona na?” kutsho uJehova. “Engimbukayo ngulo: lowo othobekileyo ozisolayo emoyeni, olesabayo ilizwi lami.

3 Kodwa lowo onikela ngenkunzi ufana lomuntu obulala omunye umuntu, lalowo onikela ngewundlu, ufana lowephula intamo yenja; lowo onikela ngamabele ufana lonikela ngegazi lengulube, lalowo otshisa impepha yesikhumbuzo ufana lokhonza isithombe. Sebekhethe izindlela zabo, lemiphefumulo yabo ithokoziswa yizinengiso zabo;

4 ngakho-ke lami ngizakhetha ukubaphatha kalukhuni, ngibehlisele lokho abakwesabayo. Ngoba kwathi lapho ngibiza, kakho owasabelayo, lapho ngikhuluma, kakho owalalelayo. Benza okubi phambi kwami, bakhetha okungicunulayo.”

5 Zwanini ilizwi likaJehova lina elilesabayo ilizwi lakhe. Uthi, “Abafowenu abalizondayo, labalixwayayo ngenxa yebizo lami, sebethe, ‘Kadunyiswe uJehova ukuze sibone intokozo yenu!’ Kodwa bazayangiswa.

6 Zwanini ukuxokozela okusedolobheni, zwanini umsindo osethempelini! Ngumsindo kaJehova ephindisela ezitheni zakhe ngakho konke okuzifaneleyo.

7 “Uthi engakahelelwa, abelethe: ubuhlungu bungakamfikeli, azale indodana.

8 Ngubani owake wezwa into enje na? Ngubani owake wabona izinto ezinje na? Ilizwe lingazalwa ngelanga elilodwa loba isizwe sizalwe ngesikhatshana na? Ikanti iZiyoni ithi ngokuhelelwa nje ihle ibazale abantwana bayo.

9 Kambe ngifikisa esikhathini sokukhululeka ngingabe ngisabelethisa na?” kutsho uJehova.

10 “Thokozani leJerusalema lilithabele, lonke lina elilithandayo; thokozani kakhulu lalo lonke lina elilililelayo.

11 Ngoba lizamunya lisuthe emabeleni alo aduduzayo; lizanatha kakhulu, lithokoze ngenala yalo enengi.”

12 Ngoba lokhu yikho okutshiwo nguJehova: “Ngizaletha ukuthula kulo njengesifula esigcweleyo. Lina lizamunya, liphathwe ngengalo yalo, lidlaliswe emadolobheni alo.

13 Ngizaliduduza njengomama eduduza umntanakhe, njalo lizaduduzeka eJerusalema.”

14 Lapho libona lokhu, izinhliziyo zenu zizathokoza, lani likhule njengotshani; isandla sikaJehova sizakwazakala ezincekwini zakhe kodwa ulaka lwakhe luzabonakaliswa ezitheni zakhe.

15 Khangelani, uJehova uza ngomlilo, izinqola zakhe zempi zinjengesivunguzane; ulaka lwakhe uzalwehlisela phansi ngokufuthelana, lokukhuza kwakhe kwehle ngamalangabi omlilo.

16 Ngoba ngomlilo langenkemba yakhe uJehova uzakwahlulela abantu bonke, njalo abanengi bazakuba yilabo ababulewe nguJehova.

17 “Labo abazahlukanisayo, bazihlambulule ukungena emasimini belandela lowo ophakathi kwalabo abadla inyama yengulube lamagundwane kanye lezinye izinto ezinengisayo – isiphetho sabo sizafika sikhathi sinye,” kutsho uJehova.

18 “Ngenxa yezenzo zabo lemicabango yabo, sekuseduze ukuthi ngizebutha izizwe zonke lezindimi zonke; njalo bazakuza babone inkazimulo yami.

19 “Ngizabeka isibonakaliso phakathi kwabo, ngithumele abanye balabo abasalayo ezizweni – eThashishi, kumaLibhiya, lamaLidiyani (alodumo ekusebenziseni imitshoko), eThubali leGrisi lasezihlengeni ezikhatshana ezingakaluzwa udumo lwami kumbe zibone inkazimulo yami. Bazamemezela udumo lwami phakathi kwezizwe.

20 Njalo bazababuyisa bonke abafowenu entabeni yami engcwele eJerusalema njengomnikelo kuJehova bevela ezizweni zonke – bephezu kwamabhiza, izinqola zempi, izimbongolo lamakamela,” kutsho uJehova. “Bazababuyisa njengabako-Israyeli beletha iminikelo yabo yamabele ethempelini likaJehova ngezitsha ezihlambulukileyo ngokomkhuba.

21 Ngizakhetha abanye babo ukuba labo babe ngabaphristi labaLevi,” kutsho uJehova.

22 “Njengamazulu amatsha lomhlaba omutsha engikwenzayo kuzakuma kokuphela phambi kwami,” kutsho uJehova, “ngokunjalo ibizo lakho lenzalo yakho izakuma kokuphela.

23 Kusukela ekuthwaseni kwenye inyanga kusiya ekuthwaseni kwenye, njalo kusukela kwelinye iSabatha kusiya kwelinye abantu bonke bazakuza bakhothame phambi kwami,” kutsho uJehova. 24 “Bazaphuma babone izidumbu zabantu abangihlamukelayo; impethu yazo kayiyikufa, lomlilo wazo kawuyikucitshwa, njalo zizakwenyanyeka ebantwini bonke.”